Eby'obunena hamwe n'emikooto
Omu micwe yaitu y'enzaarwa
Hanu omuri Kaaro-Karungi
Ni bingi, n'esaabuunga.
Abashaho b'emiringo mingi
Abashomire eby'amagara gaitu
Nibatuhabura aha by'okukoota
Na n'okurya ebitateekire.
Omwo obariiremu eby'okunena
Hamwe n'emikooto nyamwingi
Y'ebibisi n'ebitateekire
Ngu nibyo biine ekiriisa.
Nibahabura ngu ebitateekire
Ebisharwirwe kurungi
Bikayonjwa nibyogibwa
Biine ekiriisa kihango.
Ngu owaarya ebikiri bibisi
Nk'enyamaishwa z'omu kaabuunga
Ebinyonyi n'eby'omu nyanja
Agira amaani nk'ag'ezaabyo!
Manya enyamaishwa zo tizihinga
Tiziruka tizisharuura
Nka Yesu oku yatugizire
Nyamuhanga nuwe azibaisaho.
Tizishoroma tiziteeka
Zirya ebijubwe na n'ebijuma
Oby'ogwo owazihangire
Tizirya ebirabize aha muriro!
Baitu ekicuncu nari empitsi
Hariho omuri itwe obikiza amaani?
Kandi enimi, n'engundu y'embuzi
Okabyehanga okabiikarira?
Baitu okuteeka kwo ni kurungi;
Okuteeka kwiita obukooko;
Ebyakuturwarize bituuba
N'obunuzi bwongyera, bukanya!
Erigyenda itwe abashomire
Nitwepankira aha za saladi
Kwonka enyamaishwa z'okwo omu ihamba
Zituura nizigigashuura!
Mbwenu twagunjukire,
Turye enyanya mbisi n'ebikaroti
Oteebirwe na za kabegye;
Nangwa n'orutonga ruba rurungi.
Abakare n'ab'omu byaaro
Baakoota ebiriibwa na muhogo
N'obu biba bitateekire
Tibiine ki bibafeereza.
Nyaburaimwe mukootakoote,
Na katungur'icumu mutagitiina
Ngu ahabw'okuba n'enuuka;
N'obutunguru mufe okuburya.
Manya ebyo byoona ni birungi
Omu kukuuma emibiri yaitu;
Ebyo byoona ka nibikuru
Omu kurinda amagara gaitu.
Kangambe n'aha bijuma byaitu
Eby'abaana barya emikooto:
Omu harimu amapapaari
Agabaasa kuriibwa ebitumbwe.
Twine fene na wotameroni
Ebyo nabyo neby'okuriibwa;
Ebihangirwe nk'ebihaaza;
Eby'obuhere n'ebitabwine!
Baitu n'emiyembe ka ni kwo okwo
Etoorobozibwa etakahiire;
Abaana bakagirya mibisi
Eyatsigara bakatindika.
Enkyerere n'entuutu z'eishwa
Nazo ka twaziriireho,
Amahwa n'oburofa bwaazo
Tutabifeho, tukabyemera!
Reero go amasyongonzyo
N'enyonza z'okwo omu bishaka
Katwariire bikaturema
Bikaba eby'enkyende n'ebinyonyi.
Tukaba twiiha n'emitsiba
Embwishwa n'endezi nyingi.
Baitu ebyo byoona erigyenda
Bigyenzire nibihuyuuka!
Enkyerere z'okwo omu kishaka
Niziriibwa ebinyonyi byonka;
Hati amatunguru g'omu iteme
Nigaguzibwa sente omu mudidi!
Twineyo nangwa n'eshande
Eshande za buri muringo
Eziinemu emigasho mingi
Ekwaitse aha magara gaitu.
Twineyo egyo ey'ebitookye,
Eya kaizi hamwe n'omuti
Ezitakinyubwa bantu bangi
Ngu maawe embiire bakazikuura!
Nangwa itwe abaingi aba hati
Tukahiirwa twagunjuka;
Twatunga n'ebya tekinologye
Za burenda tuziine omu kyega.
Tuhaate nu ebijuma bingi
Tubitabure bibe orujwangye
Tubijungire omu burenda
Tubinywemu eshande ekwatsire.
Yaimwe abataine burenda
N'ebyoma by'okushigishagisha
Muteebwa ebyaitu ebya kare,
Eshekuro n'ebigyegyenerwaho.
Reero imwe abakiine amaino gaanyu
Mugugune aha bikaijo,
Nangwa n'ebikonko mutabitiina
Bituuramu obunuzi bwingi.
Baitu ka ngambe n'aha bunena:
Manya obunena twine bwingi;
Twine ebinyoobwa, twine n'obushaza
Ebikarangwa bikatutunga.
Ebimwe ebinyoobwa n'ebibisi
Ebibaasa kukootwa
Bikaguma biine ekiriisa:
Kwonka obumwe bikarangwa.
Obushaza bubisi tiburiibwa
Kureka bwaaba buri buto;
Obwomire bukarangwa
Bubaase nabwo kuriibwa.
Ebihimba tibiriibwa bityo
Ebibisi nainga ebyomire
Babanza babitumbika
Bakuratsaho okubiteeka.
Ebibisi nabyo tiby'okuriibwa
Bitakangire aha muriro
Binunguna, bikusheshemya
Kubiba bitateekire.
Twine n'ebishaka bingi by'Ekifirika
Ebirimu emibazi mingi;
Ebanza yashakiirwa
Ab'obufundi omu by'okutamba.
Hariho ey'ebikoko by'emiti
Nk'emisisa hamwe n'ebiko;
Twine n'egyo ey'amababi
N'ey'emizi etimbwa omu itaka.
Obwa kare tutaine kijungu
Egyo yoona ekaba etamba
Ekiza weena owarwara
Ehimbuura n'orikwenda kufa!
Kijungu ahu yaiziire
Emibazi egyo tukagyebwa
Twayesiga eby'omurembe
Eby'omwaitu twabyebwa!
Ka mbaijutsye eky'omutaano
N'ebya kijungu bitwahukira,
Ngu bitukize endwara zaitu,
Bigyegyenwa omu by'entuura.
Okwebwa ebya tunyetsize
N'akagwe katugwereire;
Hoona omuntu ayebwa emandwa
Z'omwabo ezamunyetsize?
Bantumwe kambakubuure,
Mbateise omu bishobyo byanyu;
Twehabure n'okwefuuza
Tugarukire eby'obuhangwa bwaitu.
Abashaho baitu abeegire
Abashomire ebya sayaansi
Abaine obufundi omu mibazi
Nitubasiima na Ssekusiima.
Bongyere aha magyezi gaabo,
Bateereho kukiza abantu;
Baitu abaraaze kubaraguzaho
Babaiheho ez'obuteera kishaka.
Eky'amaani eki kunsaasa
N'okureeba abashaho baitu;
Ab'emibazi yaitu y'Ekifirika
Nibashashuza sente omukimba.
Kandi obwo abu baragurira
Bamwe n'abooro ba runuuka;
Kandi emibazi i abo bashaho
Baragurisa, n'ebishaka byaitu by'omunju!
Nibyo ebyo nu eby'okukoota,
Nibyo mbibyo aha kunena;
Nibyo mbibyo aha mibazi
Abandi baryayongyerera.
Fr. Bonaventure Turyomumazima
Kilkeel, Northern Ireland
12 September 2018.