Fr. Julius Caesar Kamukama - Thanksgiving Mass - Rwera Parish - Sunday, 28 August 2022 [NEVER DELIVERED]
Readings: Isaiah 6:1-8; 2 Corinthians 4:1-9; Luke 5:1-11
Homily
Opening Hymn: Eri niryo izooba eri Mukama yataireho; katurisherererwe turyesiimireho…Alleluia…
Abakundwa omuri Kristo, ntakatandikire kwegyesa, kambanze nyarikirire nimbanjurira omugore waitu w’erizooba: Rev, Fr. Julius Caesar Kamukama, omusyasya! Faaza ninkushaba oije oyemerere aha rubaju rwangye aha nkumurukire egi enkuyanja y’abantu, abaija kukutaahira embaga ya Misa y’okusiima n’okukuhagira. Ka tumwakiire! Hymn: Nimumanya ngu Omusaseredooti weena, ayemerera obutoosha omu mwanya gwa Yezu…Yeshutamire.
Kandi, omu kwarikirira, kanyeshobororeho oku nyizire kwegyesa aha Misa egi, ey’Okusiima ahabwa Fr. Kamukama. Nyowe ninye oha? Nyowe nibanyeta Fr. Bonaventure Turyomumazima, Omusaseredooti wa Archdiocese ya Mbarara. Omu myezi ehingwire, Fr. Kamukama ogu, akanteerera esimu, yabanza yayegambagambisa, aha muheru ati: Faaza, naaba ninkushaba ngu obe niiwe wanyegyeseza aha Misa yangye y’okusiima, ebiro 28 August, aha Pariishi ya Rweera. Tindagiire kubuusabuusa nainga kuteera amatama, naamugira nti, “Eego, nti kare.” Iwe shi omuntu yaakuha ekitiinwa nk’ekyo, oti ngaaha? Kwonka nkaguma ninyebuuza ahabw’enki Kamukama yantoorana; ninye oha? Faaza ninkusiima na Ssekusiima ahabw’okumpa ekitiinwa eki, obwo ndangariire kujaguza Anniversary yangye y’Obusaseredooti, emyaka 32, ebiro 2 September 2022. Aha izooba n’keri nanye haine Omukuru owanyegyeseize, Fr. Peter Kanyandago; ebi shi obugore niburungi, noshutama obukaara abandi bakubudabuda! Ebi shi Obusaseredooti ni burungi; ebi shi okwetwa Mukama n’omugisha!
Buri rweeto rwiine history, okutandikira omu Ndagaano Enkuru, okuta aha Ndagaano Enya, nk’oku twahurira omu Kigambo kya Ruhanga ekyatushomerwa, n’okuhitsya aha magingo ga Fr. Kamukama, nangwa n’okwongyerayo…Mbwenu katushuumire enyanja ya Galilaaya egi Yesu yaayeteireho Abatendekwa be ab’okubanza. Baitu iwe Faaza Kamukama enyanja ya Galilaaya eyi yakweteireho kunu eri nkahi? Nyowe ku mbaire ninyija, naroonda enyanja eri omu bicweka ebi yamburira. Ebi naabaire nyijuka omu byanga bya kunu, ebi nyakwenkuru yaabaire antebeza, n’orunyerere hamwe n’ekyambu, oba ebyo bikibayo? Mbwenu shi iwe Faaza Kamukama, Yesu akakweterahi? Akakwetera ahaiziba ry’owanyu, akakwetera aha mudimo nootaha amaizi? Akakweterahi? Akakushanga omu rutookye noyombera, akakushanga noriisa embuzi? We Mukama akakushangahi kukweta? Nyowe eki ndi kumanya, eki iwe wenka wangambiire, nonsisira oti Yesu akakwiiha omu kaaro kaawe ka [………………], akaabaire kari enyima okwo. Okwo niyo yakweteire, okabanza n’okuheereza omu Misa ya burizooba, waija wakuguka watandika n’ okushoma amashomo omu Misa, buri kasheeshe, otaine obu oyosire, mpaho waija waashaba kuza omu by’orweto, ebi wasingwiire, okuhitsya obu wagiire omu matendekyero, aha muheru okaba eki ori erizooba. Ebi shi okarwaana mashaija, ti waagwa makazi!
Abatendekwa, abakubadiize, omu myaka nk’enkumi ebiri ehingwiire, nabo nikwo bayetsirwe, bakatandika orugyendo rw’orweto rwabo mporarampora. Abo batendekwa ab’okubanza, ngu Mukama Yesu akabashanga aha nyanja niboozya obutimba bwabo, obwo bamazire ekiro kyona nibajuba bakwatsize haakyo! Yabateeza akakodyo; manya Mukama agira obukodyo bwe obu ayetesa abo abu akunda kutoorana. Mukama nakukwatsiza aha shaaha eyi orikuba oreebire oku n’oku, waaruhire, noronda obuzo oburimu omutambo n’omuhoho gw’amagara; aha shaaha ya mwenda, akweyoreka ku akujuna. Evangiri neegira ngu Mukama aha shaaha egyo akabashaba ngu bamuhe obwato bwabo kwegyesezamu ebimbuuro by’abantu abaabaire beteekatekire kumuhurikiriza, nabo babumuha; yaayegyesa. Ku yaaherize kwegyesa, ati mugarukye mutegye obutimba bwanyu ahahikire nimwija kukwatsa. Batamanya ku Mukama, n’obu atari mujubi, kwonka Mukama, otegyeka ebintu byona, nuwe amanya ahu ebyenyanja biingi biri. Yaabagira ati n’obu mumazire ekiro kyona nimujuba mutaine ki mukwatsize, hati mutegye aha rubaju oru naabagambira, oruhikire, nimuza kukwatsa. Aha muheru gw’okworobera eiraka n’ebihaburo bya Yesu Mukama, bakwatsa ebyenyanja bingi, ebitarabaasize kuhika n’omu bwato bumwe. Niho bayeteise engaro abandi, abaabaire nabo baraije kuba abatendekwa kubayamba, bakabaha obwato bwabo, nabwo bukaijura ebyenyanja. Petero ekyo ku yakireebire kyamurenga; yaajuumara aha nsi atsimbire amaju, yaagambira Yesu ati: “ku oraabe onyiniire puraani z’okunyeta kuba omutendekwa waawe, hati ondekye, ahabw’okuba choice yaawe ogitaire ahatariho, nyowe ndi omusiisi, orondere ahandi!” Kwonka we Yesu yaamuhama, ati niiwe owu nkunzire kweta n’okucooka omu baingi; okwiha hati tokiri mujubi w’ebyenyanja, nakuhindura omujubi w’abantu.
Baitu eki tushemereire kumanya kiri ngu eizooba eri Mukama yayeterireho Petero, na Andereya omurumuna, hakataho na Yakobo na Yohaana omurumuna abaabaire bari omu bwato obundi, abaizire kuyamba ab’obwato bw’okubanza bashobairwe ahu barakwatse omudidi gw’ebyenyanja birengyesereize, ako kakaba kari akatungutungu k’okwetwa. Mukama ku aba ashaziremu kweta, tabugutana kwetera eryo; ayetwaara. N’obu Evangiri eri kuteera summary aha rweeto rwa Petero n’ab’orugabda rwe, aha by’okwetwa kwabo, baitu tukireebere omuri Mukama okwetwaara, aketonda, akabona kwiija kubatoorana. Mukama ti kigurikira, kujwahukira omwetwa. Yesu, atakeetsire Petero n’omurumuna, na bari abaabegetsireho, akabanza yaabareeba emikorere yaabo, n’obu baabaire bataine ntatsya nyingi, bakaba nibagyezaho kwebeisaho. Nimpamyamya obumwe akaba ayerabyarabyaho, areeba okwehayo kwabo, areeba okugumusiriza kwabo, okuraara aha kiro bataine ki bakwatsize, n’endi minyangararo yaabo. Ningira ngu obumwe akaba aberabyaho, abateerera aka jambo, abaramutsyaho, ababuuza aha by’embeera, arabaho agyenda, kwonka we naamanya puraani eyi abainiire.
Nahab’ekyo tutakateekateeka ngu ogwo murundi ogu Yesu yabeteireho, gukaba guri ogwokubanza kubareeba nari kubabugana, Yesu akaba atwiire naberabyaho, nareeba obukozi bwabo, okwehayo omujinya gwabo, okwehenenga kwabo, okugumisiriza kwabo, aha muheru yaagira ati aba bantu ezi ngabirano zi baine, ku ndabeete, nizo zirabahindure abajubi b’abantu, n’okuranga Amakuru Marungi g’okujunwa.
Aha rubaju orw’Abatendekwa, tumanye ngu nabo tibarashaziremu kukurata Mukama faa. Nibateekwa kuba baabaire bamuhuriireho nayegyesa, bareebire eby’amahano ebi yaabaire naakora, eby’okuhumuura empumi, eby’okukiza ebifa-matu, eby’okukiza abazingazingirwe, okukiza omukazi owabaire arwaire ekyejwiso, n’ebindi birwaire bingi. Nahabw’ekyo aha kwetwa kwabo, Mukama tarabazahambukiire akabagwamu. We, Mukamaitu akaba yabashabiire, obu yaabaire agyenda akamara ekiro kyona nashaba, obundi akaza aha rushozi kushaba oburyo bw’okutoraniramu abatendekwa. Mukama, otabugutana, omu rurimi orw’erigyenda akaba nabadeetinga.
Ekigambo okudeetinga, n’ekigambo kisya ky’obwiire bwa juba. Manya kwonyini nikimanyisaki? Nonsisira ngu omwojo nari empangare kudeetingana, nibaba nibagyezaho kwegana, okumanyana, okumanyiirana, ngu baasharamu kutatsyana, babe nibamanyana ebirungi n’ebitari birungi ebi bashemereire kugumisirirazanamu baasharamu kutatsyana kutuura hamwe amagara gaabo goona. Baitu nimpurira ngu hariho abatsigazi ba “Rujabura-ntongo”. Bo omurundi gw’okubanza gwa deetingi, nibenda kuteereraho: bahariiriza omukundwa waabo kubarabyamu! Nimukyenga eki ndikumanyisa!
Eki ndikwebuuza n’eki: ahabw’enki iwe mwojo we noyenda ngu ofunduurire ecupa ya sooda, oginywere omu kikwekweto, otagitwaire omu ka, okaba niyo wagifunduurira okaginywa eshugaine. Okwenda kunywera omu kihandagazi, tikwo okwo okuba ba “Rujabura-ntongo”!? Egyo tiyo mikwsrize ya Yesu, omu kucooka n’okweta abatooranwa be, nayetwaara, ayeha obwiire, omukweeta n’omu kutendeka.
Twaza kureeba obwiire obu Faaza Kamukama amazire natendekwa, okuruga obu ayetwa okuhitsya ahu atungiire Obusaseredooti t’ebyanda n’ebyanda? Omubwiire obwo bwona Yesu abaire namudeetinga. Kandi, nimpamya ngu na hati Faaza Kamukama atwiire nayeshwijuma ahaby’orweto rwe, okuhitsya nyomwebazyo obu atungire ekijwaaro eki atwiire narwanirira. Mbwenu nuwe ogu ori aha ahagati yanyu!
Ninyenda ngu iwe Faaza Kamukama, oijukye akashonshorekye kamwe aku ishomo ry’okubanza n’Evangiri byakoonaho: ku Mukama ari kutweeta turi abasiisi. Omurangi Isaaya, ku yareebire ekitinwa kya Ruhanga, ayemereire omu maisho gye, arangaraire kumweta, Isaaya yayemamaata, agumize ati Nyowe otaba ninye wayeta ahabw’okuba ndi omuntu w’eminwa etashemeire, n’abantu b’orikwenda kuntumamu nirwo orwo, barofahaire okuhitsya aha minwa. Imwe bantu mwe, oburofahaza-mubiri butandikirahi, t’aha bigyere? Wareeba oburofa bwatandikira aha bigyere, bukaza aha maguru, bukanyegyera bukahika aha mikono n’engaro, bukahika aha minwa, nibuba butarengyesereza. Obwa Isaaya niho bwabaire bwahika. Aho niho Mukama yayeteire Isaaya, n’obwo buzire bwe, n’obwo busiisi bwe. Maraika niho yamuteereire eikara ry’omuriro ririkwotsya aha minwa ati, “reeba nakweeza”, gyenda obe omurangi omu bantu bangye. Ekyo nikyo Yesu yakoreire Petero, buri obu ateeka amaju, agumize ati, “Nyowe ondekye, otantuma ndi omusiisi”, kwonka Yesu akagarukamu biri bigambo bi yagambiire Isaaya, ati “Otatiina, reeba niiwe natuma, hati tiwakiri mujubi w’eby’enyanja, waaza kuranga omwaka gwa Mukama ogw’embabazi, Kamukama!” Amiina!
Iwe Faaza Kamukama, orabire omu matembezo goona ag’obutendekwa, akutaire eikara ry’okukweza aha munwa yaaheza w’eminwa yaawe kuza kuranga wpekigambo kye, watsimba amaju omu maisho ga Mukama, najwekyerwa Omuriisa, wasiugwa, wasaasirwa eb’enyina, wayezibwa, watumwa kugyenda kuriisa entaama za Mukama, irorookoko oriise entaama A!
Kwonka Faaza Kamukama, oyijukye ekipande eki oriyo nokwata n’eky’amagara gaawe goona, n’ekipande ky’orweto eki orituura, amagara gaawe goona. Obumwe omushana gw’egi nsi guryakuteera, ogire solar panels, nk’ezi nyine (oruhara), obundi oryayeshanga noyekorera enshaho z’obuhunga eishokye ryawe ryere (oreete ekiharaata), obumwe orarya yoghurt ekuhame omu bireju byeere – obwo, egyo eri emyaka ya bukuru.
Manya orweto oru oyetsirwemu ti rw’amashemererwa gonka, n’enaku nk’ezi Omuhikiriire Paulo ari kukoonaho omu ishomo rya kabiri tizikaabura mu butumwa. Bantu, omu muringo nigwo gumwe Paulo nazishugaanisa ebigambo by’okukuhamya n’okukuhuumuriza, agumize ati: “Kwoka eitungo eryo [manya orweto ruba eitungo], itwe abariine, turi enyungu z’eibumba kworeka ku amaani agatakareebwaga gar aga Ruhanga, gatari gaitu. Tureebesibwa enaku embaju zoona, kwonka tituburwa bwehigiro; tushoberwa, kwonka titwehwa matsiko. Twine abazigu baingi, kwonka tituburwa banywani baitu. Kandi nobu obundi tusaasibwa munonga, tituhwerekyerezibwa…” (2 Cor 4:7-9).
Fr. Kamukama, buzya amaisho oranzye ekimbuuro ky’abantu abari aha, abaija kukushagika. Hoona obuhagizi n’eshaara zaabo nyamwingi tizirakuhangane? Oihireho ebyo, hoona na Mukama ka nagumizamu naakugira ati “Otatiina, ninyija kuba ndi naiwe.” Nyaburaiwe guma omwesigye, We owatugizire ati “Mumanye ku ndi hamwe naimwe ebiro byona okuhitsya obu obusingye bw’ensi egi burihwaho” (Matt 28:20). Fr. Kamukama, hama okore emirimo ya Ruhanga.
Mukama abe naimwe. AMIINA.
Fr. Bonaventure Turyomumazima
Nyamitanga - Mbarara