Amaarwa, amaarwa, amaarwa,
Nkagamanya ndugire kuzaarwa;
Abagazoire bo bakatwarwa
Batutsigira turi twarwa!
Hariho abo abagatenda
N'abandi abatagenda
Abagaboora nka kashenda
Kwonka baingi nibakigenda.
Omu nsi yoona bahiisa
Na Baiburi tegacwiisa;
Namwo habamu ekiriisa
Ku oganywa gari endiisa.
Owaganywa ataine buryaane,
Obwo gaba ga "Katumanyane"
Baitu againemu za katushazane,
Gareetamu na katuhayane!
Owaganywa atende kusinda
Akatima kye akakabinda,
Ekitiinwa kye akiriinda
N'ebishwaaza abihinda.
Owaganywa kubi azambaara
Agyenda nayandaara;
N'obundi akaba agangaara
Ensi ereebera okutangaara!
Nitumanya ba Rugavumba
Abatuura aha g'emitumba
Agabahindura nk'abashumba
Abooteisa bakakurumba!
Twineyo na Rushengyeera
Owaamanyiire ag'enkyeera
Oyetuurira nk'ekifeera
Okimumugambaho akatuumeera!
Tuteebwa na Rugarwanamu
Otagira Isheto na Muramu
Ni Kaini ogambwaho ekihemu
Nka mwene Haamu (Eva) na Adamu!
Nuwe ogwo Rusinda, Rutongana, Rurwaana
Akaata rwekyoojo, otamanya kunywaana;
Ni rubura, ni rwaata, otagira na mwaana
Akacwamu obuhuuru, hamwe n'obuzaana!
Abandi bakagakubya amaata-naama
Gafumura aha mutwe gugumire nk'ebyaata mpaama
Gatwaara obwongo bwawe Ruhamama
Gahinda n'oturo twaawe,obura kubyaama.
Amaarwa, amaarwa, amaarwa:
Gabuungisa, garwaanisa!
Amaarwa, amaarwa, amaarwa:
Gahugisa, gakwanisa!
Amaarwa, amaarwa, amaarwa:
Tigatungisa; gagumbisa!
Amaarwa, amaarwa, amaarwa:
Gayombesa, gataanisa!
Gaita obunywani butakahiire
Gaita n'obuzaare butakufiire.
Otakanyweire maingi nu ayecure
Owaganyweire akakooha ka muhabure
Atarohamibwa ago amahemure
Asiimure na baingi abahabure.
Fr. Bonaventure Turyomumazima
Kilkeel, Northern Ireland
14 September 2018
*Akashoboorora (Footnote):
Ekitongyerero eki okihikaanise n'Akatabo: Ekitongyerero eki okihikaanise n'Akatabo: ka Benedikito K. Mubangizi, "Amaarwa n'Eminywere Yaago" Kisubi Marianum Press, 1964, pp. 1-50; hamwe n'Ekihandiiko ky Fr. Bonaventure Turyomumazima: "Amaarwa, Okureetsa n'Ebitokooza Bwongo," omuri Ai Nuunu Uganda (ekitakashohoire).