Mbweineyo Diya wangye
Owu nkubize Kyokuhiirwa
Namuha n'erya Dalingi
Buzima kwo ka mpiriirwe!
Akashoma ni Gurajuweeti
Ashomire ebya kompyuuta
N'eby'esimu z'omu ngaro
N'akajungu naakagamba gye!
Akasimu ke k'omu ngaro
Ti kitafaari, ti katooki
Ni taachi fooni y'ebeeyi
Ya Intaneeti na Whatisappu!
Akashokye ke kanyiriire
Akakomeise na za bureidi
Iya ring n'ezemiringa
Nekileezi ze ni dayamondi!
Amaisho gye n'enyonyoozi
Amaino gye n'orubaare
Enyindo ye eshongoize;
N'ow'eminwa ya Kebirungi!
Akuziregye n'omunyeete
Ti mugufu nainga Muhangi
Aringaniire nyaburawe
Noreebera okutangaara!
Nyakutonda akamutona sheepu
Yamuheereza figa 8
Akabina ka nkariyaaa
Naribata nakahuungura!
Emikono ye ti bunyaafu
Nyakuhanga akagirunga
Yagisiiga n'akarangi
Ni nk'ey'omugore omu rusiika!
Amaguru gye ti mihunda
Teine na ntumbwe z'obutomi
Nyakugabumba aketwaara
Ndikaitwa yagashoronzya!
Eibeere ti stokingi
Nk'erizeire abaana mwenda
Rishongweize, rikyemereire
Okwontsya oraije kubanza!
Ai nuunu ka mpiriirwe
Ai nwengye ka mpwereirwe
Kutunga Diya Dalingi
Wu naatooraine omu baingi!
Fr. Bonaventure Turyomumazima
Kilkeel, Northern Ireland
Tuesday, 26 Jun 2018, 6:23 pm GMT+3
DOWNLOAD THE FULL ARTICLE HERE